Интроверттерге арналған нетворкинг: сауық-сайранды ұнатпасаңыз, байланыстарды қалай нығайтуға болады

Жиын, визиткалар, фуршеттің жанындағы қолайсыз әңгімелер – бұл адамдармен танысудың жалғыз ғана жолы емес. Интроверт үшін анағұрлым тыныш тәсіл бар: байланыстарды өзіңізге ыңғайлы жерде және сіз үшін жайлы жолмен орнату. Лайқос шаршағандыққа тап болмай, адамдарды қай жерден іздеу мен қалай сөйлесу керектігін анықтады.

Неліктен интроверттерге де нетворкинг қажет

• Нетворкинг ≠ сауық–сайран. Пайдалы таныстықтар шулы сауық кештер барысында ғана емес, сонымен бірге хат алмасып тұру, шағын кездесулер немесе ортақ жобаларды жүзеге асыру кезінде де пайда болады. Кейде мұндай форматтар анағұрлым берік байланыстарды беретіні хақ.
• Өсуге арналған құрал. Жаңа байланыстардың арқасында жұмыс бойынша ұсыныстар да, қызықты жобалар да, бизнес үшін әріптестер немесе, тіпті, ермек ісіңізбен бөлісуге болатын адамдар да келеді.
• Интроверттердің мықты жақтары. Басқа адамды тыңдай білу, ұсақ-түйек нәрселерге зейінділік таныту мен терең әңгімелерге деген бейімділік шынайы сенімділікті қалыптастыруға септігін тигізеді. Танысу кезінде экстраверт жылдам «жүгіріп өткен» жерде интроверт ұзаққа созылатын достық пен ынтымақтастықтың негізін салуы бек мүмкін.

Шулы іс-шараларсыз адамдарды қайдан іздеуге болады

• Онлайн-алаңдар. LinkedIn, Telegram-чаттар, онлайн-қауымдастықтар немесе тақырыптық форумдар – қысым танытпай танысудың тамаша орындары. Мұнда араласудың ыңғайлы ырғағын таңдау мен қызығушылықтарыңызға қарай жақын адамдарды бірден табуға болады.
• Шағын форматтар. Кітап клубтары, шеберлік сабақтары, воркшоптар, үстел ойындары немесе хобби бойынша жабық топтар: сіздерде ортақ тақырып бар, әрі ыңғайсыздық туғызатын үндемей қалу сәттері мүлдем дерлік болмайды.
• Бетпе–бет. Кей кездері әріптесіңізді бір шыныаяқ кофе ішуге шақыра салу, әлеуметтік желі арқылы сарапшыға хат жазу немесе қысқа бейнеқоңырау туралы келісіп қою әлдеқайда жеңілірек. Мұндай формат адамға толыққанды назар аударуға, әрі артық шусыз және қандай да бір алаңдататын факторларсыз байланысты тереңірек орнатуға көмектеседі.

Интроверттерге арналған тілдесім техникалары

• Дайындық. Кездесу алдында бірнеше тақырыпты немесе сұрақты алдын ала дайындап қойған пайдалы. Мәселен: «Сіз осы мамандыққа қалай келдіңіз?» немесе «Дәл қазір сіз үшін нені зерттеген қызық болып отыр?» – бұл әңгімені оңай бастап кетуге септігін тигізеді.
• Белсенді тыңдау. Адамдардың көбі мұқият тыңдай білетін әңгімелесушіні бағалайды. Интроверт үшін бұл табиғи дағды, ал байланыс үшін – бұл орасан зор артықшылық.
• Шағын мақсаттар. Барлық адамдармен танысуға талпынудың қажеті жоқ. Кем дегенде бір адаммен байланыс орнату міндетін қою жеткілікті – осының өзі жетістік екені сөзсіз.
• Хат/хабарлама жазысу. Мессенджерлер мен пошта ой елегінен өткізілген жауапты жазуға уақыт береді және стресті төмендете түседі. Сонымен бірге олар кездесуден кейін де, байланысты жайлы форматта сақтай отырып, диалогты әрі қарай жалғастыруға мүмкіндік туғызады.

Беймаза қылмай, байланысты сақтаудың жолы

• Пайдасы бар хабарламалар. Әрбір апта сайын жазудың қажеті шамалы. Кейде пайдалы материалдың сілтемесімен бөлусі, қандай да бір мерекемен құттықтау немесе әшейін амандық сұрасудың өзі жеткілікті.
• Жиілік емес, тұрақтылық маңызды. Өзіңіз жайлы еске түсіру мен жабысқақ болып көрінбеу үшін екі айда бір ғана қысқа хабарлама жазу жеткілікті болмақ.
• Шынайылық. Телефондағы жүздеген формалды нөмірлерді сақтағаннан гөрі бірнеше шынайы байланысқа ие болу әлдеқайда маңыздырақ. Адамдар көңіл бөлгенді, әрі адалдықты ресми сыпайылықтан гөрі анағұрлым жоғары бағалайды.

Қорытынды

Интроверттерге арналған нетворкинг шулы сауық кештермен шектелмейді. Бұл жайлы форматтарды таңдау, өз ырғағыңызда араласу мен байланысты қандай да бір қысымсыз сақтай білу икемділігі. Жүйелілік пен адамдарға деген ілтипат, тіпті, сирек кездесулердің өзін де уақыт өте келе кез келген визиткалардан жақсы жұмыс істейтін мықты, сенімді байланыстарға айналдырады.