Әріптес бастық атанды: жаңа қатынастарды қалай орнату керек

Күні кеше сіздер темекі тартатын орында демалыс күндерге деген жоспарларыңызды бірге талқылаған едіңіз, ал бүгін жұмыс бойынша міндеттерді қойып, нәтижелерді талап етіп отырсыз. Таныс жағдай ма? Қатардағы қызметкерден бұрынғы әріптестеріңіздің жетекшісіне ауысу – мансап жолындағы ең шетін маневрлердің бірі. Бұл тұста айқайға дейін түсіп кетпеу, өзімсінуге жол бермеу, сонымен бірге құрметтен айырылып қалмау қиынның қиыны. Лайқос қажетті кәсіпқой қашықтықты қоса отырып, жақсы қарым-қатынастарды құрудың тәсілін айтып береді.

1 қадам: Алғашқы және ең маңызды әңгіме

Үндемей қалып, бәрі де өздігінен шешілетін шығар деп үміттену – нашар нұсқа. Сіздің міндетіңіз – ойын ережесін бірінші болып белгілеу. Команданың әрбір мүшесімен, соның ішінде жақын араласқан адамдарыңызбен қысқа әрі жеке түрде әңгімелесіңіз. Дәлізде немесе шылым тартатын орында емес! Әрқайсысына келіссөздер кабинетінде 15 минут уақытыңызды бөліңіз.

Не айтқан жөн?

Айқын жайттарды мойындаудан бастаңыз: «Жағдай баршамызға да үйреншікті емес, әрі маған да бейімделу үшін уақыт қажет». Бұл алғашқы жағдайлық шиеленісті алып тастайды.

Содан кейін назарыңызды болашаққа аударыңыз: «Мен жұмыстағы ортақ тәжірибемізді жоғары бағалаймын. Ендігі менің рөлім – командамыздың жақсы нәтиже беруіне жағдай жасау».

Әрі ережелерді нақты белгілеп өтіңіз: «Мен барынша әділ болуға тырысамын. Бұл тұста сіздердің адал кері байланысыңыз мен үшін маңызды, дегенмен енді – тек жұмыс қатынастары аясында».

Орындай алмайтын нәрселерді – қандай да бір ерекше қарым-қатынасты, не болмаса бәрі де бұрынғысынша қалатынын уәде етпеңіз. Сіздің жаңа міндетіңіз – әділдік.

2 қадам: Қатынасу үлгілерін ауыстырамыз

Бұл жерде табыстың 80% жасырынған. Сіздің мінез-құлқыңыз жұмсақ түрде, дегенмен жаңа шынайылықты тиянақты көрсетіп тұруы тиіс.

Жұмыста – тек қана кәсібилік:

• Астыртын әңгімелерді тоқтату. Ендігіден былай бір бұрышта отырып алып басшылықты немесе әріптестеріңізді талқылауыңызға болмайды. Мұндай әңгімелерден сыпайы түрде кетіп қалыңыз.
• Арналарды бөлу. Жеке қалжыңдар мен мемдер – бөлек мессенджерде немесе жұмыстан кейін болуы керек. Жұмыс чаты – міндеттер мен маңызды хабарландыруларға арналған.
• Өзімсінуге тыйым салынады. Жиналыстарда дөрекі сөйлесуге жол бермей, қызметкерлерді есімдері бойынша атаңыз. Бұл бүкіл командаға жөн сілтейді.

Әділдік – сіздің басты капиталыңыз:

• Достарға ешқандай артықшылықтар жоқ. Күрделі міндеттерді де, қызықты жобаларды да теңдей үлестіру. Кез келген босаңдық жасау міндетті түрде байқалады және беделіңізге нұқсан келтіреді.
• Тек іс бойынша сын айтыңыз. Дос болған адамдарға кері байланыс беруді ұмытпаңыз. Нақты, сындарлы сын – олардың кәсібилігіне деген құрметтің белгісі.
• Көпшілік алдында мақтаңыз. Бүкіл команда мен бөлек қызметкерлердің жетістіктерін баршаның алдында атап өткеніңіз абзал. Бұл салауатты атмосфераны қалыптастырады.

3 қадам: «Қолайсыз» шешімдерді қалай қабылдау керек

Бұл шындық сәті. Бұрынғы байланыстар басқару шешімдеріне мүлдем әсер етпеуі керек, әрі осы тұста достықтан жауапкершілікке көшкен дұрыс, өйткені сіз енді жеке ұнатушылықты сақтау үшін емес, тұтас команданың нәтижесі үшін жауап бересіз. Эмоциялардың орнына қисынды басшылыққа алыңыз.

Қиын шешімдерді қабылдаудың жолы:

• Себептерін түсіндіріңіз. Командаңызға мынадай бизнес-мәнмәтінді жеткізіңіз: «Бұл айналымды 15% арттыруымыз үшін қажет» немесе «мұндай талап жоғарыдан түсті».
• Тыңдап алыңыз. Дәлелдер мен алаңдаушылықтарды білдіруге мүмкіндік беріңіз. Команданың пікірі маңызды екендігін көрсетіңіз.
• Шешім қабылдаңыз және жауапкершілікті өзіңізге алыңыз. «Мен барлық айқындамаларды тыңдап шықтым. Барлық жайттарды ескере отырып, біз былай істейміз. Мен осы таңдау үшін жауап беремін». Бұл құрметке лайық.

4 қадам: Көпірлерді өртемей, жаңаларын құру

Сіздің мақсатыңыз – «бастық-бөгде біреуге» айналу емес, артыңыздан еруге болатын адам болу. Сондықтан адамгершілікті сақтай біліңіз. Әріптестеріңіздің хал-жағдайы мен көңіл-күйін сұраңыз, алайда мұны шын жүректен жасаңыз. Сондай-ақ жеке оқиғаларға тереңдеуден де аулақ болғаныңыз жөн.

Өзіңізге қатысты кері байланыс беруді сұраңыз. «Мен, жетекші ретінде, саған тиімдірек жұмыс істеуге қалай көмектесе аламын?» деген сұрақ – өсу мен диалог үшін мықты құрал екені сөзсіз.

Қаперіңізде болсын: сіздің жетістігіңіз командаңыздың жетістігіне тікелей байланысты. Сіз – олардың үстінде емес, алдындасыз.

Қорытынды

Бұл ауысу – сіздің кәсіби кемелдігіңізге деген емтихан. Барлық қиыншылықтар уақытша ғана, ал жаңа деңгейде құрылған қарым-қатынастар нағыз жеңістердің іргетасына айналады. Жетекші болу – алыстау дегенді емес, өзімен ертіп жүруді білдіреді. Әрі бұрынғы әріптестеріңіз, осы жолды сізбен бірге жүріп өтіп, ең ұйымшыл әрі мықты командаға айналуы бек мүмкін.