Секстің болмауы денсаулыққа қалай әсер етеді
Жыныстық қатынастың жоқтығы көбінесе гормондар бұзылысымен, күйзеліс және алуан түрлі аурулармен байланыстырылады. Лайқос бұл рас па екендігін анықтады.
Жыныстық қатынассыз ағзаға не болады
Секстің болмауы өздігінен денсаулыққа зиянды емес. Жыныстық өмірдің бірыңғай «нормасы» жоқ: біреуге жыныстық қатынасқа жиі түскен ыңғайлы, біреуге сирек, ал енді біреуге ол мүлдем қажет емес. Бұл ретте байланыстардың саны емес, адамның өзін-өзі физикалық және эмоциялық тұрғыдан қалай сезінетіні маңызды болып отыр. Зерттеулер көрсетіп отырғандай, жыныстық қанағаттану деңгейі неғұрлым жоғары болса, өмір сапасы да соғұрлым жоғары және мазасыздық пен депрессия деңгейі төмен болады.
Психологиялық хал-күй
Көптеген адамдар үшін секс – бұл демалу, ләззат алу және жақындықты сезіну тәсілі. Егер адам осыған үйреніп кеткен болса, жыныстық қатынастың жоқтығы ләззат алудың бір көзін жоғалғандай сезілуі мүмкін – осыдан барып ашуланшақтық, мұңға берілу немесе жалғыздық пайда болады.
Ұйқы мен күйзеліс
Секс, әсіресе, оргазммен болғанда кейбір адамдарға босаңсуға және ұйқыға тез батуға көмектеседі. Алайда онсыз адам міндетті түрде нашар ұйықтайды немесе көбірек күйгелектенеді деуге болмайды. Ұйқы мен күйзеліске күн тәртібі, физикалық белсенділік және демалыс сапасы әлдеқайда қаттырақ әсер ететіні хақ.
Гормондар мен етеккір циклі
Цикл көптеген себептердің салдарынан бұзылуы бек мүмкін: күйзеліс, тамақтанудың жеткіліксіздігі, қарқынды жаттығулар, салмақтың ауытқуы немесе қалқанша безіне қатысты түйткілдер. Сол себептен тұрақты емес етеккірді автоматты түрде жыныстық қатынастың болмауымен байланыстырудың қажеті шамалы.
Әйел денсаулығы
Жыныстық қатынастың болмауына қатысты жамбас мүшелеріндегі қанның «тоқтап қалуы» жайындағы дақпырт ғылыми тұрғыдан расталмаған. Ал үзілістен кейін жыныстық өмірді қайта жалғастыру кезіндегі ыңғайсыздық – нағыз шындық: әдетте ол жеткіліксіз деңгейдегі қозумен, жамбас бұлшықеттерінің құрғақтығымен немесе ширығуымен байланысты болып келеді. Егер ауырсыну сезімі қайталанса, бұл қалыпты жағдай емес – гинекологқа баруға себеп.
Еркек денсаулығы
Ер адамдарда жыныстық қатынастың болмауы тестостерон өндірісін «тоқтатпайды» және қуықасты безіне қатысты мәселелерді автоматты түрде тудырмайды. Сексуалдық қызмет еркектің жас шамасына, денсаулығына, күйзеліс, ұйқы мен қарым-қатынастарына байланысты болады.
Қай кезде сақ болған жөн
Бар гәп «тартынудың» өзінде емес, онымен бірге жүретін жайтта жатыр: аса қатты сезілетін жалғыздық, мазасыздық, либидоның өзгеруіне деген наразылық. Егер жыныстық қатынасты қалау кенет жоғалса, әрі ауырсыну, құрғақтық немесе қобу түйткілдері пайда болса, дәрігердің көмегіне жүгіну қажет, өйткені бұл – күйзеліске, дәрі-дәрмектерге немесе гормондар бұзылысына байланысты болуы ықтимал.
Сексті немен алмастыруға болады
Жыныстық қатынас – жақындық пен ләззаттың жалғыз көзі емес. Мастурбация, құшақтасу, уқалау, спорт немесе жақын адамдарыңызбен жылы қарым-қатынас босаңсуға және физикалық байланысты орнатуға көмектеседі. Ең бастысы, бұл «нормаға сай болу» талпынысы емес, сіздің еркін таңдауыңыз болуы керек.