Ерлерге арналған өзін-өзі күту: келбетті көріну және өзіңді сенімдірек сезінудің жолы

Ұзақ уақыт бойы өзін-өзі күту – тек қана әйелдерге қатысты жайт деп саналған. Алайда заманауи ер адам сырт келбетінің көз тартарлық әрі жинақы болуы – бұл әшейін эстетика ғана емес, сонымен бірге сенімділік, өзін-өзі сыйлау және денсаулық кепілі екенін түсінеді.

Тері, қол, шаш және денеге дұрыс күтім жасау адамға әлдеқайда жасаң көрінуге, өзін анағұрлым жақсы сезінуге көмектеседі, өйткені тері – бұл біз үшін басты қорғаныс тосқауылы. Ал қосымша ілтипат пен мақтаудан бас тартатындар кемде-кем шығар.

Лайқос ерлерге арналған өз-өзіне күтім жасаудың негізгі кезеңдерін қарастырып, демалу мен күш-қуат жинауға көмектесетін толыққанды бьюти-күнді қалай ұйымдастыруға болатынын анықтап білді.

Өзін-өзі күтудің негізгі кезеңдері

Бет күтімі

Адамдар кездескен кезде, ең алдымен, бетке назар аударады. Сондықтан кәдімгі сумен жуыну – бұл онша жақсы нұсқа емес екен.

• Тазалау – май, шаң және токсиндерді кетіреді. Бет жууға арналған гель немесе көбікті теріңіздің типіне қарай таңдаңыз.
• Скраб (аптасына 1-2 рет) – терінің қабыршақтанған жасушаларын кетіреді және қара нүктелердің пайда болуының алдын алады.
• Ылғалдандыру – тері, тіпті, майлы болса да, оған иісмай қажет, әйтпесе тері одан да майлы бола түседі.
• Әжімдерге қарсы иісмай – жас шамасына қарай профилактикалық іс-шараларды қолға алу ешқашан артықтық етпейді.
• Ерінді ылғалдандыратын далап – бұл әсіресе қыс мезгілінде өзекті, суық пен желдің әсерінен ерін құрғап, жарылып кетеді.

Кеңес: егер қырыну терінің тітіркенуін тудырса, процедурадан кейін алоэ-гель немесе құрамында пантенолы бар иісмайды пайдаланып көріңіз.

Ерлерге арналған қандай күтім құралдары үйде болуы керек

• Терінің түріне сәйкес жуынуға арналған гель
• Бетке арналған ылғалдандыратын иісмай
• Агрессивті сульфаттары жоқ сусабын
• Құрамында спирті жоқ жақсы дезодорант
• Сақалға арналған май (сақал болған жағдайда)

Маникюр және қол күтімі

Қол – ер адамның визит карточкасы. Күніне қанша рет қол алысып амандасатыныңыз, құжаттарға қол қоятыныңыз, бетіңізге тигізетініңіз туралы ойланып көріңізші. Құрғақ тері, тістелген тырнақ, саусақтың көбеген терісі – бұл харизмаға нұқсан келтіретін тұстар.

• Тырнақты аптасына бір рет алып отыру және жарықшақтанбас үшін егеу керек.
• Әсіресе, қыс мезгілінде қолға арналған иісмайды қолданған абзал.
• Айына бір рет – ерлерге арналған маникюрді жасату үшін шеберге бару (айтпақшы, лаксыз маникюр).

Күтім барысында майларды қолдану

Майлар – бұл жақсы күтімнің құпия ингредиенті. Олар тері, шаш, сақал және, тіпті, тырнақты да қоректендіреді.

• Арган майы – шаш пен сақалды керемет жұмсартады.
• Кокос майы – құрғақ теріні құтқарады және иісмайдың орнына қолдануға болады.
• Шай ағашының майы – қабыну мен бөртпелермен күреседі.

Кеңес: иісмай немесе сусабынға майдың бірнеше тамшысын тамызыңыз – әсері бірден байқалады.

Қосымша процедуралар

• Физикалық белсенділік – дене үшін ғана емес, сондай-ақ тері үшін де қажет. Спорт қан айналымын жылдамдатады, терідегі ұсақ тесіктерді тазартады, ал жаттығып болған соң контрастты душ қабылдау теріні серпімді ете түседі.
• Барберге бару – айына бір рет шаш алдыру жалпы кейіпті жаңартады және сыртқы келбетті жақсартады. Бұл, әсіресе, сақалы бар ер адамдарға қатысты айтылған сөз.
• Сауна және уқалау – токсиндерді сыртқа шығарады, күйзелісті жеңілдетеді және қан айналымын жақсартады.
• Көнтақалану мен сүйелдерді кетіру табаныңызды жұмсартады, жүрген кезде жайсыздық сезімін жеңілдетеді.

Кеңес: айына бір рет өзіңізге спа-күнді ұйымдастырыңыз – тұзды ванна, бетке арналған маска мен уқалау дивандағы кез келген демалыстан әлдеқайда артық босаңсытатыны сөзсіз.

Толыққанды күтім күнін ұйымдастырудың жолы

Егер қалпыңызға келуді қаласаңыз, келесі жоспарды қолданып көріңіз:

Кеңес: егер күтім жасауға тұтас бір күнді арнауға уақытыңыз болмаса, әрдайым жинақы қалпыңызда қалу үшін процедураларды бір аптаға бөліп тастаңыз.

Күтімге тағы нені қосқан жөн

• Физикалық белсенділік қан айналымын жақсартады, зат алмасу үдерісін жылдамдатады және теріге сау реңк береді.
• Су – жастықтың басты қайнар көзі. Ұсынылатын мөлшері – күніне 2-2,5 литр, алайда ағзаның жеке ерекшеліктерін ескеру маңызды.
• Омега-3 май қышқылдары (балық, жаңғақ, авокадо) теріні ылғалдандырады, шаш пен тырнақты нығайта түседі.
• А, Е және С дәрумендері қартаю үдерістерін баяулатады, терінің құрғақтығымен күресуге көмектеседі және оның қалпына келуіне себептеседі.
• Мырыш пен биотин шашты нығайтады, шаштың түсуіне жол бермейді.
• Ақуыздың жеткілікті мөлшері (ет, жұмыртқа, бұршақ тұқымдастар) жасушалардың тезірек қалпына келуіне көмегін тигізеді.

Қорытынды

Өзіңізге күтім жасау – бұл әлдебір қиын немесе «ерлерге жат» нәрсе дегенді білдірмейді. Бұл өзіңізді анағұрлым сенімдірек сезіну, келбетті көріну және ұзақ жылдарға денсаулығыңызды сақтап қалудың тәсілі. Мұны бірнеше сағатқа созылатын қандай да бір рәсімге айналдырудың қажеті жоқ – бар болғаны сізге жинақы қалпыңызда қалуға көмектесетін бірнеше қарапайым әдеттің өзі жеткілікті. Олай болса, неге дәл бүгін бастамасқа?