Тісті ағарту: стоматология немесе халық әдістері – қайсысын таңдасақ екен?

Голливудтық күлімдеу – көптеген адамдардың арманы, ал тісті ағарту мұратқа жетудің ең таралған тәсілдердің біріне айналып отыр. Аппақ қардай тіс кіреукесі жастық, денсаулық және күтіммен байланыстырылады. Жұрт тістерін әртүрлі себептерге қатысты ағартқысы келеді: біреулер жас ерекшелігіне байланысты кіреукенің қараюымен күресіп жатса, басқалары кофе мен қызыл шарапқа деген сүйіспеншілігінің салдарымен алысады, ал енді біреулері фотосуреттерде жарқырауды қалап тұрады.

Алайда кәсіби және үй жағдайындағы ағартудың айырмашылығы бар ма? Әрі сода мен лимон шынымен де стоматологқа кіріп-шыққанды алмастыра ала ма? Тіс дәрігері Сергей Винокуров осының мән-жайын анықтауға көмектесті.

Кәсіби тіс ағарту

Егер жылдам және көзге көрінерлік айқын нәтижеге қол жеткізгіңіз келсе, кәсіби тіс ағарту – ең үздік нұсқа болмақ. Дәрігерлер үй жағдайында қол жетпейтін анағұрлым қойылтылған құрамдар мен технологияларды қолданады. Кеңінен таралған әдістерге жататындар:

• Лазерлік тіс ағарту – арнайы гель лазердің көмегімен белсендіріледі де, ағарту үдерісін жылдамдатады. Нәтиже – сол мезетте байқалады, алайда процедурадан кейін тіс сезімталдығы айқындалуы мүмкін.
• Фотоағарту (ZOOM, LumaCool, Beyond) – гельге ультракүлгін немесе жарықдиодты шамдармен әсер етіледі, бұл процедураны жылдам және тиімді ете түседі.
• Химиялық тіс ағарту – сутегінің асқын тотығы негізінде жасалған күшті құрам қолданылады. Баршаға қолайлы бола бермейді, өйткені қызыл иектің тітіркенуін тудыруы ықтимал.

Кәсіби тіс ағартудың оң және теріс жақтары

Оң жақтары:

• Жылдам және айқын нәтиже (5-10 реңкке дейінгі ағарту).
• Тіс дәрігерінің бақылауында қауіпсіз.
• Ұзақмерзімді нәтиже (дұрыс күтім болса, жарты жылдан бастап бірнеше жылға дейін).

Теріс жақтары:

• Жоғары баға (шамамен 150 мың теңге, әдіске байланысты болады).
• Процедурадан кейін жоғары сезімталдық ықтималдығы.
• Тісті ағартқаннан кейін тамақтанудағы шектеулердің қажеттілігі.

Үй жағдайында ағарту

Кәсіби процедураларға көпшілік қомақты соманы жұмсауға дайын бола бермейді, сондықтан үйге арналған тіс ағарту құралдарының нарығы өркендеп келеді.

• Ағартатын тіс пасталарының құрамында жұмсақ абразивтер мен ферменттер бар, алайда олар тіс кіреукесін ағартпайды, тек қана үстіңгі өңезді алып тастайды.
• Жолақтар мен гельдердің құрамында сутегінің асқын тотығының кішігірім концентрациясы бар, 1-2 аптадан кейін көзге көрінерлік нәтижені береді.
• Ағартатын тіссауыттар – жеке немесе әмбебап тіссауыттар жиынтықтары, олардың іші гельмен толтырылып, күніне 20-30 минутқа тіске тағылады.

Және халық арасында кеңінен таралған әдістер:

• Сода мен белсендірілген көмір абразив ретінде әсер етеді, тістік өңезді алып тастайды, дегенмен тіс кіреукесін жұқартуы мүмкін.
• Лимон мен құлпынайдың құрамында тіс кіреукесін шынымен ағартатын қышқылдар кездеседі, алайда олар құрылымын бүлдіреді.

Егер сіз тісіңізді 1-2 реңкке ағартуды қаласаңыз, әрі бірнеше апта күтуге дайын болсаңыз, үй жағдайында істеуге болатын әдіс-тәсілдер әбден қолайлы болмақ. Алайда паста немесе көмірден нағыз голливудтық ақтықты күтудің қажеті жоқ, әсіресе, темекі тартуды ұнатқан жағдайда мұндай әсердің болмайтыны анық. Не дегенмен кәсіби күтімді таңдаған әлдеқайда жақсырақ, не болмаса тексерілген үйге арналған құралдарды қолдануға да болады, егер олар сауатты қолданылса, тіс кіреукесін зақымдау қаупі туындамайды.

Қауіптер мен қарсы көрсетілімдер

Тіс ағарту – бұл әшейін ғана косметикалық процедура емес, бұл тіс кіреукесінің құрылымына күрделі араласу болып келеді. Егер мәселеге дайындықсыз қарасаңыз, тіске зиян келтіруіңіз әбден мүмкін.

• Жоғары сезімталдық – ағарту тісті салқын және ыстық нәрселерге анағұрлым сезімтал етуі ықтимал.
• Тіс кіреукесінің бұзылуы – агрессивті құралдар, әсіресе, жиі қолданылған жағдайда, кіреукені жұқартып жіберуі мүмкін.
• Қызыл иектің тітіркенуі – егер гель шырышты қабатқа түссе, күйік және қабыну пайда болуы ықтимал.

Қарсы көрсетілімдер:

• Тісжегі және қызыл иек аурулары.
• Жүктілік пен емізу.
• Ағартатын құралдардың компоненттеріне деген аллергия.

Процедурадан кейін тістің ақтығын қалай сақтаймыз

Ағарту процедурасынан кейін ережелерді сақтаған маңызды, әйтпесе оның нәтижесі тез жоғалатын болады.

Тіске үнемі күтім жасау

• Нәтижені сақтау мақсатында ағартатын пастаны аптасына 1-2 рет пайдаланғаныңыз жөн.
• Пигменттердің тіс кіреукесімен түйісуін барынша азайту үшін тамақтан кейін аузыңызды шайып отырғаныңыз абзал.
• Жылына 1-2 рет кәсіби тазартуға барып тұрғаныңыз дұрыс.
• Шылымнан бас тартыңыз немесе балама нұсқаларды қарастырыңыз. Темекі түтінінің құрамындағы шайыр тістің бетіне қонып, кіреукенің микрожарықшаларына еніп кетеді және уақыт өте келе сарғыш түске бояйды, әрі тісжегі қаупін арттырады. Тіпті, тұрақты түрде жасалатын ағарту процедурасы кезінде де пигменттердің жинақталуы жалғаса береді. Алайда балама нұсқа баршылық, бұл – хиттерлер нұсқасы, олар жану үдерісіне жол бермей, сонымен бірге түтіннің түзілуін болдырмай, темекіні тек қана қыздырады. Бұл зиянды заттектердің тіс кіреукесіне деген әсерін төмендетеді және ауыз қуысының денсаулығына анағұрлым ұқыпты қарауды қамтамасыз ете отырып, тістің табиғи түсін сақтауға көмектеседі. Ал егерде нағыз голливудтық күлімдеудің болғанын армандасаңыз, бұл әдеттен біржолата бас тартуыңызға тура келеді.

Процедураларды теріс пайдаланбағаныңыз абзал: кәсіби тіс ағартуды 10 айда бір реттен артық емес, ал үй жағдайында – жарты жылда бір рет жасау ұсынылады. Мінсіз нәтижеге қол жеткізу үшін тіс ағартудың осы түрлерін қатар алып жүруге де болады, алайда дәрігердің қатаң бақылауында ғана.

Қорытынды

Тіс ағарту – бұл сырт келбетіңізді жақсартудың тиімді тәсілі, дегенмен мұны ақылға салып істегеніңіз жөн. Кәсіби әдістер жылдам және тұрақты нәтиже бергенімен, қымбатқа түсетіні хақ. Үй жағдайындағы тәсілдер анағұрлым арзанырақ, бірақ шыдамдылық пен сақтықты талап етеді. Ең бастысы, бұл –тістің ақтығы емес, тістің денсаулығы маңызды екенін қаперіңізден шығармаңыз. Тіс кіреукесін күтіңіз, тісіңізге күтім жасаңыз, сонда жымиысыңыз да әдемі ғана емес, сондай-ақ сау болары сөзсіз.