Бет терісіне арналған гаджеттер: дұрыс таңдау мен зиян келтірмеудің жолы

Қазіргі заманғы сұлулық индустриясы барған сайын тері күтіміне арналған технологиялық шешімдердің түр-түрін ұсынып келеді. Салондар мен косметологтар, әлбетте, басты сарапшылар ретінде қала бермек, дегенмен үй жағдайында қолдануға болатын бетке арналған гаджеттер аренаға сенімді түрде шығып жатыр. Олар инъекциялар мен хирургияның көмегіне жүгінбеcтен, жасарту, тазарту, лифтинг және, тіпті, әжімдерден құтылуға да уәде береді. Алайда олар шынымен де осындай нәтижені бере ала ма? Лайқос дерматокосметолог Лаура Әбдібаевадан аталмыш құрылғылардың қалай жұмыс істейтінін, олардың қандай артықшылықтары бар және күтпеген кедергілер кездесуі мүмкін бе екендігін біліп алды.

Бет терісіне арналған гаджеттердің негізгі түрлері

Бетке арналған бьюти-гаджеттер бірнеше топқа бөлінеді – бұл олардың функцияларына байланысты болып келеді. Ультрадыбыстық щеткалар мен жуынуға арналған құралдар теріні терең тазартады, қабыршақтанған жасушалар мен кірленуді алып тастайды. Уқалағыштар – дөңгелекті, дірілді, микротоқты болады, олар қан айналымын жақсартады және тері тонусын арттырады. LED-маскалар жарық толқындарының көмегімен қабыну мен қартаю белгілеріне әсер етсе, дарсонваль мен микротоқты стимуляторлар бет бұлшықетін нығайтады және алмасу үдерістерін жақсартады.

Жас ерекшелігіне байланысты өзгерістермен күрескен кезде термолифтинг және радиожиілікті лифтингке (RF-лифтинг) арналған аппараттарды пайдаланады, олар коллагеннің бөлінуін ынталандырады және теріні тартып тұрады. Вакуумдық құрылғылар терідегі ұсақ тесіктерді тазартуға көмектесіп, лимфодренажды әсер береді.

Сауатты қолданылған жағдайда бұл гаджеттер терінің күйін айтарлықтай жақсартады және оның жастығын ұзарта алады.

Бьюти-гаджеттерді немен толықтырамыз

Дәрумендерді қабылдау: ас үлесіңізге A, C, E қосылған дәрумен кешендерін, сонымен бірге коллаген мен омега-3 қосыңыз. Олар теріні ылғалдандыру, серпімді ету және сыртқы факторлардан қорғауға көмектеседі.

Өмір салтыңызды қайта қараңыз.

• Алкогольден бас тарту немесе шектеу – алкоголь теріні сусыздандырады, күңгірт етеді және қартаюын жылдамдатады.
• Темекі шегуден бас тарту немесе зияны азырақ баламаларға ауысу – темекі түтіні коллагеннің бөлінуін төмендетеді, қан айналымын нашарлатады және қартаю үдерістерін тездетеді. Темекіге қарағанда хиттерлер жану үдерісіне, түтіннің түзілуі мен тиісінше канцерогендердің ағзаға енуіне жол бермейді. Алайда мына бір жайтты есіңізден шығармаңыздар: теріңіз үшін ең үлкен сыйлық – жаман әдеттерден біржолата бас тарту.
• Дұрыс тамақтану – ас үлесіңізге көкөніс, жеміс, жаңғақ пен пайдалы майларды көбірек қосыңыз, осылайша сіз теріңізді қажетті қоректік заттектермен қамтамасыз етесіз.

Дұрыс күтім

• Тазарту – кірленуді кетіру және теріні гаджеттердің әсеріне дайындау үшін үнемі және мұқият тазалау.
• Ылғалдандыру – су теңгерімін сақтап отыру мақсатында иісмайлар мен сарысуларды қолдану.
• Күннен қорғау – фотоқартаюдың алдын алу үшін SPF-қорғаныс, тіпті, бұлтты күндерде де қажет.

Осы әдістерді бьюти-гаджеттермен біріктіргенде тері күтім көрген, анағұрлым сау және жарқыраған бола түседі.

Бьюти-гаджеттерді қолдану кезіндегі қателіктер

• Шамадан тыс қолдану: мұндайда көбірек, яки жақсырақ дегенді білдірмейді. Басты ереже – терінің реакция беруін қадағалау және процедуралар бойынша марафондарды ұйымдастырмау. Ал оларды қаншалықты жиі қолдану керектігі жайында өз косметолог маманыңызбен ақылдасқаныңыз жөн.
• Құрылғыға дұрыс күтім жасамау: косметиканың қалдықтары, терінің майы, шаң және бактериялар құралдың үстінде жиналып қалады да, содан кейін қайтадан бетіңізге түседі. Нәтижесі – қабынулар, бөртпелер және тітіркену. Терімен жанасатын гаджет таза болуы шарт. Оны тұрақты түрде арнайы ерітінділермен өңдеп отырған абзал.
• Қабынған немесе зақымдалған теріге қолдану: ашық жаралар, сызаттар немесе күйген жерлер болған жағдайда, акне немесе розацеа асқынғанда және агрессивті косметикалық процедуралардан (пилинг, лазерлік әсер) кейін бьюти-гаджеттерді қолданбаңыз.

Егер күмәніңіз бар болса, косметолог немесе дерматолог мамандарымен кеңескеніңіз дұрыс.

Қорытынды: сатып алуға тұрарлық па?

Гаджеттер – бұл күтімге арналған керемет қосымша, алайда бұл сиқырлы таяқша емес. Олар тек тұрақты түрде, дұрыс және сауатты күтіммен бірге қолданылған кезде ғана жұмыс істеп, пайдасын әкеледі. Дегенмен күрделі түйткілдерге тап болған кезде, мәселен, терең әжімдер немесе птоз бар болса, маманның көмегіне жүгінген абзал.

Есіңізде болсын: лезде жасару мен ғажайыптар туралы маркетингтік уәделерге сенудің керегі жоқ. Тері сиқырлықты емес, жүйелі және ғылыми тұрғыдан дәлелденген әдіс-тәсілдерді ұнатады. Саналы түрде таңдау жасаңыз, дерматологтардан кеңес алыңыз және әдемі болып жүре беріңіз!