Қашықтағы жұмыс орнын қалай тиімді ұйымдастыруға болады

Коронавирустуқ пандемия – адамдарды кеңселерден бас тартуға және үйден жұмыс істеуге мәжбүрлеген жалғыз себеп емес. Көптеген жылдар бойы декреттік демалыстағы әйелдер, қозғалғыштығы шектеулі адамдар мен алуан түрлі мамандықтарға жататын мамандар қашықтан жұмыс істеп келеді. Мұны тиімді жасаудың әдіс-тәсілі туралы Лайқос айтып береді.

Бастысы – көңілдің ауып тұруы

Жұмыс пен демалысты бөлуді ұмытпаңыз. Бұл тұста тәртіп те, кесте де, сонымен бірге жұмыс орнының қайда және қалай ұйымдастырылғаны да жұмысқа деген көңілдің ауып тұруына көмектесе алады. Төсектің үстінде жұмыс істеуге кеңес бермейміз: бұл компьютер үшін де (қызып кетуі мүмкін), арқа үшін де (дене мүсіні бұзылады), жалпы жұмыс істеуге деген ниетке де зиянын келтіреді. Үйден жұмыс істеген кезде төсек орнын тек қана демалу мен барлық істерден қандай да бір уақытқа алыстаудың нүктесі ретінде сақтаған маңызды.

Кейбір адамдарға қалыптасқан кеңселік тәртіпті ішінара сақтау көмектеседі: таңертең ұйқыдан ерте ояну, душқа шомылу, пижаманы жұмысқа киілетін киімге ауыстыру, макияж жасау, әрі сағат 9 міндеттерге кірісіп кету. Сонымен қатар көптеген компаниялар сағат 9 бастап 6 дейін жұмыс істейді, яғни, бастық немесе клиенттермен байланыс жасау уақыты сәйкес келетін болады.

Үйдегі жұмыс орнын жоспарлау

Қайда отыру керек

Жеке бөлме, яки, жұмысқа арналған кабинетті бөлу мүмкін болса, тіптен жақсы болар еді. Егер мұндай мүмкіндік болмаса, онда жұмыс аймағын бөлменің бір бұрышында ұйымдастырыңыз. Кеңістікті бөліп қою үшін қалқаны пайдалансаңыз болады.

Нені ескергеніңіз маңызды:

• Жарық. Пернетақта мен құжаттарға жарық қай жақтан түсіп тұрады, монитордағы кескіндердің көрінуіне нұқсан келтірмейтіндей, терезеден түсетін жарықтың шағылыспайтынын тексеріңіз.
• Шу. Терезеден келетін шуыл көңілді бөліп жіберуі ықтимал, асүйде отбасы мүшелері сөйлесіп отыруы мүмкін, ал жатын бөлмеде жұбайыңыз теледидарды қосып қойған болар. Ең тыныш жерді іздеңіз.
• Күн райы. Егер есік жақтан немесе терезеден жел үрлеп тұрса, мойныңызға немесе бүйіріңізге жылдам суық тиюі ықтимал, онда сіз ұзаққа дейін ауырсынуды сезініп, тіпті, төсек тартып жатып қалуыңыз да әбден мүмкін. Жылы әрі өтпе жел соқпайтын орынды таңдаңыз.

Қандай жиһазды қойған абзал

Үстел бетінің кеңдігі жеткілікті болуы керек, сонда үстіне барлық қажетті заттар – ноутбук, қойын дәптер, құжаттар сыятын болады. Егер бөлме кеңістігі шағын болса, тартпалары мен сақтауға арналған сөрелері бар үстелдер өте қолайлы.

Орындықты дұрыс таңдау омыртқаның денсаулығы және жалпы жайлылықты сезіну үшін аса маңызды жайт. Биіктігін реттеуге болатын, әрі бел аймағын ұстап тұратын және арқаның бұрышын өзгерту мүмкіншілігі бар эргономикалық үлгілері ең қолайлы болып келеді.

Қандай құрал-жабдықтарды алған жөн

Жақсы жылдамдықты қамтамасыз ету мақсатында техникаңызды мүмкіндігінше жаңартқаныңыз немесе «жақсартып» алғаныңыз дұрыс. Мәтіндер және графикамен жұмыс істеген кезде екінші монитордың бар болғаны ыңғайлы — бұл бір уақытта бірнеше тапсырманы орындауды жеңілдете түседі. Тінтуірмен көп жұмыс істейтін адамдар үшін джойстик түріндегі тік нұсқасын қарастырған жөн – бұл жағдайда қолыңыз аса шаршамайды.

Бұлтты күндері және кешкі уақытта жұмыс істеу үшін жарығы реттелетін үстел шамын сатып алыңыз. Жарықтың жылы спектрін таңдаған абзал, ол көздің шаршауын азайтады және зейін қоюға көмектеседі.

Монитор көз деңгейінде немесе одан төменірек орналасуы тиіс. Экранға дейінгі арақашықтық — 50-70 см құрауы керек, бұл көз бен мойын бұлшықеттерінің шаршауын төмендетуге септеседі.

Тиімді жұмыс істейміз

Қашықтан жұмыс істеу көбіне-көп жоғары дәрежедегі тәртіп пен тайм-менеджмент бойынша жетілдірілген дағдыларды талап етеді. Қысқа үзілістер туралы қаперіңізден шығармаңыз. Күні бойы сағат сайын тұрып, сергіту жаттығуларын орындау немесе сыртқа шығып серуендеуге тырысыңыз.

Үй ішінде жайлы және әдемі жұмыс орнын ұйымдастыру — бұл сіздің өнімділігіңіз бен саулығыңызға құйылған инвестиция. Кішігірім нәрселерден бастаңыз да, қажет болған жағдайда бірте-бірте керекті элементтерді қосып отырыңыз, әрі өзіңізге нағыз шабыт сыйлайтын жұмыс атмосферасын құрыңыз.