Қонақ неке: еркіндік пе, әлде арақашықтық па?

Кейде әлдебіреулер үшін классикалық неке, яғни, ерлі-зайыптылар бір үйде тұрғанда, қолайсыз болып келеді, әрі жұптар отбасылық өмірдің балама формаларын таңдайды. Лайқос қонақ неке дегеніміз не және бұл кімге жарамды екендігін анықтады.

Қонақ неке дегеніміз не

Жалпы қонақ неке – бұл ерлі-зайыптылардың тіркеген және бөлек тұратын некесі, алайда олар романтикалық және отбасылық қарым-қатынастарды сақтап отырады. Олар екеуіне ыңғайлы болған уақытта бір-бірінің үйіне келіп тұрады, демалыс күндерін бірге өткізеді, саяхаттайды – сонымен бірге дербес үйлері мен жеке кеңістіктерін сақтайды.

Маңызды жайт: бұл еркін қарым-қатынас емес. Жұп бір-біріне деген адалдығын сақтап, сырттай жүріс іздемейді.

Неге қонақ некені таңдайды

• Жеке кеңістік – адамдардың барлығы бірдей 24/7 тәртібінде тұрмыс пен кеңістікті бөлуге дайын бола бермейді.
• Мансаптық амбициялар – егер жұмыс немесе бизнес барынша зейін қоюды талап етсе, бөлек тұру анағұрлым ыңғайлы болуы мүмкін.
• Алдыңғы негативті тәжірибе – қиынға соққан айырылысуды немесе ажырасуды бастан кешкен адамдар өткен тәжірибені қайталаудан үрейленуі ықтимал.
• Әртүрлі қалалар немесе елдер – егер ерлі-зайыптылар әртүрлі жерлерде жұмыс істесе немесе білім алып жатса, қонақ неке жалғыз мүмкін нұсқаға айналады.
• Психологиялық жайлылық – кейбір адамдарға жалғыз тұрған әлдеқайда ыңғайлы, алайда олар отбасылық қарым-қатынастардан бас тартқысы келмейді. Кей кездері адамдар күнделікті өмірде сәйкессіздікке тап болады.

Қонақ некенің оң және теріс жақтары

Оң жақтары:

• Еркіндік пен тәуелсіздік – әрқайсысында жеке кеңістік пен үйреншікті тұрмыс салты бар.
• Тұрмыс жоқ, демек дау-жанжалдар жоқ: ешкім ыдыс жуылмаған немесе шұлықтың барлығы әр жерде жатыр деп күңкілдемейді.
• Қатынастардың жарқындылығы – сирек кездесулер романтиканы сақтайды, бірге өткізген уақыттың құндылығын арттыра түседі.
• Икемділік – кездесулер кестесін екеуіне ыңғайлы болатындай құру.
• Жеке даму – әркім өзінің сүйікті ермек ісі және мансабымен айналыса алады.
• Айырылысу жеңілірек, егер қатынастар өз шегіне жетсе, ажырасқан оңайға соғады.

Теріс жақтары:

• Тұрақты қолдаудың жоқтығы – қиын сәттерде жұбыңыз алыста болуы мүмкін, осы тұста жалғыздық сезімі пайда болады.
• Қашықтау қаупі – сирек болатын кездесулер салдарынан сезімдер басылуы әбден мүмкін.
• Балаларға байланысты қиындықтар – егер ерлі-зайыптының балалары болса, бөлек тұру шартында олардың тәрбиесі қиынға соғуы ықтимал.
• Қоғам тарапынан айыптау – қарым-қатынастардың мұндай форматын адамдардың барлығы бірдей түсіне бермейді.
• Қаржылық шығындар – екі бөлек тұрғын үйді ұстау қымбатқа түсуі бек мүмкін.
• Қызғаныш сезімі жұптың бірін айтарлықтай қысуы ықтимал.

Қонақ неке кімдерге жарамды

Бұл формат баршаға бірдей жарамды бола бермейтіні айқын. Көбінесе мұндай қатынастарды келесілер таңдайды:

• Жеке кеңістік пен тәуелсіздікті бағалайтын адамдар.
• Бірге тұру бойынша жағымсыз тәжірибесі бар жұптар.
• Саяхаттайтын немесе әртүрлі елдерде өмір сүретін адамдар.
• Тұрмысқа көңіл бөлу қиынға соғатын жоғары жұмысбастылыққа ие адамдар.
• Қарым-қатынастардағы құштарлық пен жаңашылдықты сақтағысы келетін жұптар.

Қорытынды

Дәстүрлі неке мен оның баламалы нұсқалары арасындағы таңдау – әркімнің өз ісі. Ең бастысы, оның құндылықтарыңыз, қалауларыңыз бен өмір салтыңызға сәйкес келуі. Өйткені бақытты қатынастар – бұл басқалардың қалай тұрып жатқандары туралы емес, бұл дәл сізге қаншалықты жайлы екені турасында.