Секс және қауіпсіздік: қолдану жөніндегі нұсқаулық

Секс – бұл эндорфиндер көзі мен сүйікті адамыңызбен жақындаса түсудің тәсілі ғана емес, сонымен бірге бұл денсаулығымыздың толыққанды құрамдас бөлігі. Шындығында, құмарлық қызулығымен маңызды бір жайт туралы ұмытып кету оп-оңай. Лайқос естеріңізге салады: қауіпсіздіңтің қамын ойлау романтиканы бүлдірмейді. Тіпті, керісінше деуге болады – сіз барлығы бақылауда екендігіне сенімді болсаңыз, босаңсу мен ләззатқа бөлену әлдеқайда жеңілірек. Өзіңізді өмір қуаныштарынан айырмай, қауіптерді қалай төмендетуге болатынын анықтаймыз.

Дұрыс сақтанудың жолы

Мүшеқап – біздің ең жақсы досымыз, дегенмен ол алаңдағы жалғыз ойыншы емес. Мінсіз әлемде сарапшылар «қос әдісті» қолдануға кеңес береді:

• Кедергілі (мүшеқап): көптеген жұқпалардан қорғайды.
• Гормонды немесе жатырішілік (дәрілер, жабыстырғыштар, спиральдар): жоспарға кірмейтін жүктіліктен жүз пайызға дерлік сақтандырады.

Қаперіңізден шығармаңыз: үзілген жыныстық қатынас – бұл контрацепция тәсілі емес, бұл нағыз лотерея.

Егер қандай да бір нәрсе дұрыс болмаса (мәселен, мүшеқап жыртылған жағдайда), бұл ретте шұғыл контрацепция көмекке келеді. Оны алғашқы 24-72 сағатта қолданғаныңыз абзал. Дегенмен мына бір жайтты ұмытпаңыз: бұл «Б жоспары» тек төтенше жағдайға ғана арналады, әрі ол тұрақты тәжірибеге айналмауы тиіс, өйткені мұны әйел денсаулығы үшін салауатты нұсқа деп айтуға мүлдем келмейді.

ЖЖБА: көзге көрінбейтін қонақтар

Жыныстық жолмен (ЖЖБА) берілетін көптеген аурулар жылдар бойы білінбеуі мүмкін екендігімен қауіпті. Ешқандай да қышу немесе жайсыздық болмайды – ал үдеріс жүріп жатады.

• Рәсімге айналған чек-ап. Жарты жылда бір рет АИТВ, сифилис және гепатитке талдау тапсыру – бұл тура тістерді тексеру секілді гигиенаның нормасы болып келеді.
• Вакциналау. Біз көбінесе кейбір түйткілдерге қарсы жай ғана екпе салуға болатынын ұмытып кетеміз. АПВ (адам папиллома вирусы) мен В гепатитіне қарсы вакциналар – бұл ұзақ өмір сүруіңізге деген шынайы инвестициялар.

Гигиена және кішігірім қулықтар

Денсаулық ұсақ-түйек нәрселерден құралады, әрі олар жайында кітаптарда жиі жазылмағанымен, олар адамның хал-жайына өте қатты әсер етеді.

«Кейін» ережесі. Урологтар ұсынатын қарапайым кеңес: жыныстық қатынасқа түскеннен кейін бірден дәретханаға бару несеп жолындағы бактериялардан «арылуға» көмектеседі және жыныстық қатынастан кейінгі цистит қаупін айтарлықтай төмендетеді.

Лубриканттар сиқыры. Құрғақтық – бұл тек жайсыздық қана емес, сондай-ақ шырышты қабықтың микросызаттарға тап болу тәуекелі, ал инфекциялар сол арқылы ағзаға оңай еніп кетеді. Агрессивті хош иістендіргіштері жоқ су немесе силикон негізіндегі құралдарды таңдаңыз.

Диалог пен келісім. Психологиялық жайлылық маңыздылығы жағынан физикалық жайлылықтан кем түспейді. Жағымсыз нәрселерге «жоқ» деп айта білу және ойын ережесін ашық талқылау – салауатты жыныстық қатынастың негізі.

Қорытынды

Төсектегі қауіпсіздік – бұл жалықтыратын шектеу емес, бұл кемелділік пен өзіңізге деген қамқорлықтың белгісі. Аурулардың бар-жоғын анықтайтын тест тапсыру, қорғаныстың тиісті әдісін таңдау және лубрикантты уақытында қолдану – бұл да тура таңертеңгі йога немесе теңдестірілген таңғы ас іспетті салауатты әдеттер. Өзіңізбен әрі жұбыңызбен адал болыңыз, дәрігерлерге сұрақ қоюдан ұялмаңыз және мына бір жайтты есіңізден шығармаңыз: жыныстық қатынас алаңдаушылық тудыратын себептердің тізімін емес, тек қуаныш сыйлауы тиіс.