EMS-жаттығулар дегеніміз не және олар қаншалықты тиімді

Көз алдыңызға үдерістерді екі есе жылдамдататын чит-кодты қосып қойғаныңызды елестетіп көріңізші: сіз небәрі 20 минут жаттығасыз, алайда әдеттегі 40-60 минут жаттыққандай әсерге ие боласыз. Айта кетсек, мұндай чит-код өмірде бар. Әрі ол EMS – Electrical Muscle Stimulation (бұлшықетті электрлік ширату) деп аталады. Лайқос мұның қалай көрінетіні мен осындай жаттығулардың шын мәнісінде қаншалықты тиімді екендігін анықтады.

EMS-жаттығулар дегеніміз не

EMS-жаттығулардың қағидасы қарапайым: электродтар импульстерді жіберіп отырады, әрі олар тура кәдімгі жаттығулар барысындағыдай бұлшықеттің жиырылуын мәжбүрлейді. Бұл импульстер азырақ уақыттың ішінде көбірек бұлшықетті белсендіре түседі, осылайша жаттығу әлдеқайда тиімді болып шығады.

EMS-жаттығулар кімге жарамды

• Жұмысбасты адамдарға. Егер толыққанды жаттығуларды орындауға уақытыңыз болмаса, дегенмен нәтижеге қол жеткізуді қаласаңыз, онда EMS дәл сізге арналады.
• Жарақат алған адамдарға. EMS буындарға салмақ түсірмей, бұлшықетті қатайтуға көмектеседі.
• Балама нұсқаларды іздейтіндерге. Егер қалыпты жаттығулар шабыт әкелмесе, EMS керемет нұсқаға айнала алады.
• Кәсіпқой спортшыларға. EMS төзімділікті арттыру мен қалыпқа келуіңізді жылдамдатуға септігін тигізеді.

EMS-жаттығулардың оң және теріс жақтары

20 минуттық жаттығулар уақытыңызды үнемдеуге көмектеседі. Сонымен бірге бұл бұлшықеттің анағұрлым көбірек талшықтарын белсендіре отырып, жаттығуды айтарлықтай тиімді етеді, дегенмен буындарға әлдеқайда төмен жүктемені береді – бұл жарақаттан кейін денені қалпына келтіру үшін немесе қарқынды жаттығуларды орындай алмайтын адамдарға маңызды. EMS қан айналымын жақсартады, сондықтан қалыпқа келу айтарлықтай жылдам жүріп жатады.

Мұндай жаттығулардың кемшіліктері де баршылық: естеріңізге сала кетсек, EMS дәстүрлі жаттығулардың орнын толықтай баса алмайды, әрі барынша жоғары әсерге ие болу үшін екеуін біріктірген абзал. Бұдан басқа жүрек-қан тамырлары аурулары мен тері дерттеріне шалдыққан адамдарға дәрігермен алдын ала ақылдасып алған дұрыс. Үшінші бір ықтимал кемшілігі – қарапайым залмен салыстырғанда жаттығулар бағасының біршама жоғары болып келуі.

Дақпырттар пен шындық

Дақпырт: EMS-жаттығулар барлық жаттығулардың орнын алмастырады.

• Шындық: EMS тиімді, дегенмен оңтайлы нәтижені алу үшін оларды дәстүрі жаттығулармен үйлестірген дұрыс.

Дақпырт: EMS – барлық түйткілдерді шешіп беретін сиқырлы таяқша.

• Шындық: EMS бұлшықетті ширатуға көмектеседі, алайда айтарлықтай өзгерістерге қол жеткізу мақсатында жаттығуларды дұрыс тамақтану және белсенділікпен біріктіру қажет.

Дақпырт: EMS тек салмақ тастағанда ғана көмектеседі.

• Шындық: EMS бұлшықет тонусы мен шыдамдылықты жақсартады, зат алмасуды жылдамдатады, бірақ артық салмақтан арылу үшін ас үлесі мен кардионы бақылап отырған ерекше маңызға ие.

Дақпырт: EMS – бұл ауыртады және ыңғайсыз болып келеді.

• Шындық: процедура жеңіл шаншуды тудырады, дегенмен бұл тез кетеді және әдетте жайсыздықты туғызбайды.

EMS кімге қарсы көрсетілген

• Жүкті әйелдерге. Электрлік ширату ана мен баланың денсаулығына әсер етуі мүмкін.
• Жүрек-қан тамырларының аурулары бар адамдарға. Электр импульстері жүрек пен тамырлардың жұмысына ықпал етуі ықтимал.
• Эпилепсиямен ауыратын адамдарға. Электр ширату тырысу ұстамаларын қоздыруы мүмкін.
• Жіті жұқпа мен қабыну кезінде. Жаттығулар ағзаның жағдайын нашарлатуы және қалыпқа келу үдерісін баяулата түсуі ықтимал.
• Тері түйткілдері бар адамдарға. Мәселен, экзема, псориаз немесе ашық жаралар болған жағдайда электрод тітіркену немесе инфекцияны тудыруы мүмкін.

Қорытынды

EMS-жаттығулар – көп уақытты жұмсамай-ақ денеңізді қалыпқа келтірудің жылдам әрі тиімді тәсілі. Алайда кез келген басқа тәсіл секілді, бұған да саналы көзқараспен қарау керек. Сіз дәл өзіңізге қолайлы болатын жаттығуларды таңдағаныңыз абзал, сонымен бірге жүктеме мен қалыпқа келу арасындағы тепе-теңдік туралы ұмытпағаныңыз жөн. Дене – сіздің басты ресурсыңыз, әрі оған қамқорлық таныту барлық деңгейлерде маңызды.