Жалқауларға арналған СӨС: бес минуттық ұйқы мен қозғалыс өмір ұзақтығына қалай әсер етеді

Спортпен айналысуға уақыт жоқ, ұйқы тәртібі реттелмей жатыр, ал пайдалы әдеттерге күш мүлдем қалмай ма? Жақсы жаңалығымыз бар: денсаулықты ешқандай да ерліксіз-ақ күтуге болады. Ғалымдар кейде күніне бірнеше артық минуттың өзі жеткілікті болатынын анықтады. Лайқос неден бастау керектігін айтып береді.

Қандай әдеттер жасыңызға жас қосады

Ғалымдар еClinicalMedicine басылымында жарияланған зерттеуінде орташа есеппен алғанда сегіз жыл бойы бақыланған 60 мыңға жуық адамның деректерін талдады. Тіпті, кішігірім өзгерістердің де маңызы бар екені анықталды. Салауатты өмір салтын мүлдем ұстанбайтындар үшін күніне бес минуттық ұйқы, екі минуттық дене белсенділігі және көкөністердің жарты порциясын жеудің өзі олардың болжамды өмір сүру ұзақтығын шамамен бір жылға арттыратынымен байланыстырылды.

Жаман әдеттері барларға қарағанда 7-8 сағат бойы ұйықтайтын, күніне 40 минуттан артық уақыт қозғалатын және дұрыс тамақтанатын қатысушылар, авторлардың есептеуінше, шамамен тоғыз жылға ұзағырақ өмір сүріп, дені де әлдеқайда ұзағырақ сау болуы мүмкін.

Ұйқы, тамақтану және қозғалыс әдетте жеке-жеке зерттеледі, дегенмен өмірде олар тығыз байланысты. Сондықтан бір саладағы серпілістен гөрі бірнеше саладағы кішігірім жақсартулар айтарлықтай тиімдірек болары сөзсіз.

Тіпті бес минут жаяу жүрудің де маңызы бар

Басқа бір зерттеуде ғалымдар физикалық белсенділіктің мезгілсіз өлім қаупімен қалайша байланысты екендігін зерттеді. Олар Норвегия, Швеция, АҚШ және Ұлыбританиядан 135 мыңнан астам ересек адамның деректерін талдап шықты.

Авторлардың есептеуінше, күніне орташа немесе қарқынды белсенділіктің қосымша небәрі бес минуты популяциядағы өлім-жітімнің 10% дейінгі жағдайдың алдын алуы мүмкін. Онша белсенді емес адамдар арасында бұл көрсеткіш шамамен 6% құраған. Егер адамдар күніне 30 минутқа аздау отырса, өлім-жітім саны шамамен 7% төмендеуі мүмкін.

Мұны күнделікті өмірде қалай қолдануға болады

Бір кішкентай қадамнан бастап көріңіз, ал ол үйреншікті жайтқа айналған кезде келесісін қосыңыз:

• ұйқыға бес минут ертерек жатыңыз;
• лифт немесе көлікпен жасалатын қысқа сапардың орнына жылдам жүріңіз;
• тамақтанған кездің біріне көкөністердің жарты порциясын қосыңыз;
• бір тәтті сусынды стақан сумен алмастырыңыз;
• таңғы асқа ақуыз көзін қосыңыз: жұмыртқа, табиғи йогурт немесе сүзбе;
• кешкісін телефон алаңдатпауы үшін оны керуеттен алысырақ қойыңыз;
• ұзақ отырғаннан кейін тұрып, бой жазуға арналған қысқа жаттығуларды орындаңыз.