Тамақ антидепрессант ретінде: қаңтарда жақсы көңіл-күйге арналған бес рецепт

Мерекелер аяқталды – әрі олармен бірге энергия жоғалып, қысқы енжарлық та білдірмей келіп қалды. Жарық күн қысқа, серотонин деңгейі төмендей түсті, ал ағза жылу мен ләззаттың жылдам көздерін іздей бастайды.

Ағзаңызға қолдау көрсетудің қарапайым және қолжетімді тәсілі – дұрыс тамақтың бір тәрелкесі. Лайқос өмірге қуаныш сезімін қайтару мен күйзеліс деңгейін төмендетуге көмектесетін бес қарапайым рецептіні жинады.

Банан, жаңғақ және жылы дәмдеуіштер қосылған сұлы

Сұлы – миға серотонинді өндіруге көмектесетін күрделі көмірсулардың қайнар көзі болып келеді. Бананның құрамында триптофан және B6 дәрумені бар, ал жаңғақтар магний мен пайдалы майлардың арқасында жүйке жүйесін нығайтады.

1 порцияға:

• сұлы үлпегі – 50 г (шамамен 5 ас қ.);
• су немесе сүт – 200-250 мл;
• банан – 0,5-1 дана (100-120 г);
• жаңғақ (грек немесе бадам) – 15-20 г;
• бал – 1 ш. қ. (қалауыңыз бойынша);
• даршын – 0,5 ш. қ.;
• жұпар жаңғағы – пышақтың ұшында.

Қалай дайындау керек: сұлыны су немесе сүтке пісіріп алыңыз. Туралған бананды, бір уыс жаңғақты (грек немесе бадам), бір шымшым даршын мен жұпар жаңғағын қосыңыз. Қаласаңыз, кішкене бал қоссаңыз да болады.

Кокос сүті қосылған асқабақ езбе сорпасы

Асқабақ бета-каротин мен антиоксиданттарға бай, ал кокос сүті тоқмейілдік пен жайлылық сезімін береді. Бұл тура бір «құшақтайтын» тамақ іспетті.

1 үлкен порцияға:

• асқабақ (тазартылған) – 300 г;
• пияз – 0,5 орташа жуашық (50-70 г);
• сарымсақ – 1 тісі;
• көкөніс сорпасы немесе су – 250 мл;
• кокос сүті – 80-100 мл;
• зәйтүн майы – 1 ас қ.;
• куркума – 0,5 ш. қ.;
• зімбір – 0,5 ш. қ. немесе жас тамырының кесегі (1 см);
• тұз, бұрыш – дәміне қарай.

Қалай дайындау керек: асқабақты пияз және сарымсақпен бірге көмештеңіз, содан кейін блендердің ішінде көкөніс сорпасы және кокос сүтімен бірге ұсақтаңыз. Куркума, зімбір және қара бұрышты қосыңыз.

Көк шөп пен ірімшік қосылған омлет

Жұмыртқа – мидың жұмысына қажетті холин, D дәрумені мен ақуыздың көзі. Көк шөп – фолаттарды, ал ірімшік триптофанды қосады.

1 порцияға:

• жұмыртқа – 2 дана;
• сүт немесе су – 1-2 ас қ.;
• қатты ірімшік – 30 г;
• асжапырақ немесе кез келген көк шөп – 30-40 г;
• қуыруға арналған май – 1 ш. қ.;
• тұз – дәміне қарай.

Қалай дайындау керек: жұмыртқаны араластырыңыз, асжапырақ, көк пияз немесе аскөкті, кішкене қатты ірімшікті қосыңыз. Баяу отта дайындаңыз.

Жасымық пен көмештелген көкөністер қосылған жылы салат

Жасымық – темір мен магнийдің өсімдіктекті көзі, олардың тапшылығы көбіне-көп шаршағандық және енжарлықпен байланысты.

1 порцияға:

• жасымық (құрғақ) – 60 г (дайын түрінде – шамамен 150 г);
• сәбіз – 1 орташа данасы (100 г);
• брокколи немесе қызылша – 100-150 г;
• зәйтүн майы – 1 ас қ.;
• лимон шырыны – 1-2 ш. қ.;
• тұз, дәмдеуіштер – дәміне қарай.

Қалай дайындау керек: жасымықты пісіріңіз, көмештелген сәбіз, қызылша немесе брокколиді қосыңыз, зәйтүн майы және лимон шырынымен қатыңыз.

Неліктен мұның көмегі зор: тойымды, дегенмен жеңіл тамақ ауырлық пен ұйқышылдық сезімінсіз энергияны қолдайды.

Ащы шоколад + жылы сусын

Иә, бұл да рецепт. Ащы шоколад (70% басталатын) эндорфиндер мен серотониннің өндірілуін ынталандырады.

Порция:

• ащы шоколад (70% және одан да жоғары) – 20-30 г (2-3 бөлігі);
• сусын (какао, шай немесе сүт) – 200 мл.

Какао үшін:

• какао ұнтағы – 1 ш. қ.;
• сүт немесе өсімдік сүті – 200 мл;
• бал – 0,5-1 ш. қ. (қалауыңыз бойынша).

Қорытынды

Біздің не тамақ жейтініміз гормондар деңгейіне, жүйке жүйесінің жұмысы мен шамадан тыс жүктемеге төтеп беруге тікелей әсер етеді. Теңдестірілген тамақтану күйзелісті өмірден алып тастамайды, дегенмен ағзаны оған анағұрлым төзімді ете түседі. Өзіңізге сабырлық танытыңыз және өз денсаулығыңызға дер кезінде көңіл бөліңіз.